Аҧхыӡ џьашьахәы

Аҧхыӡ џьашьахәы         Баҭал лассы-ласс аҧхыӡқәа ибоит. Адырҩаҽны ианаашалак иҩызцәа ҧхыӡ иибаз рзеиҭеиҳәоит. Баҭал даара бзиа ибоит аҧхыӡқәа реиҭаҳәара. Уахык зны Баҭал ҧхыӡ џьашьахәык ибеит. Адырҩаҽны иҩызцәа ирзеиҭеиҳәеит.        «Аҩны схалазаҵәык сыҟахын. Уаҳа уаҩ дыҟамызт. Ҳгәылара дынхоит ҷкәына хәыҷык. Уи ихахәы еиқәаҵәамлаҳаӡа, иблақәа амаахырқәа реиҧш иҭеиқәаҵәааӡа дыҟоуп. Еснагь илакҭақәа ырцәгьан дуҿаҧшуеит. Сара сицәшәоит уи аҷкәын. Аҩны схала санаанха еиҳагьы сшәо, сқьыџьқыџьуа салагеит. Уи аҷкәынгьы аҩны ихала дыҟоуп ҳәа здырхуеит, убри аҟынтә сышьҭыбжь иаҳар ҳәа сшәаны сахьтәаз сыҽсырқәацаӡомызт. Уи ахәыҷы сара дсықәлоуп, аха сара даара дысцәымҕуп, сицәшәоит. Сыҧсы ӡаны аҟәардә сықәтәоуп, снаҧшааҧшуа. Сышьҭахь ала дсаҩаӡаны дсысыр ҳәа сшәоит. Сымчқәа ааизызган, сҩагылеит.      – Уабаҟоу, уцәырҵ! Ухы сырба! - ҿыҭуа сишьҭахуп уи аҷкәын. Ус аҩнашә аҧхьа даацәырҵит. Сшәан, сгәы ҭыҵуама сҳәо, аисра иалагеит. Иаргьы ашырҳәа инапы дҩахеит.       – Сумыпҟан! – дсыҳәо далагеит уи аҷкәын.       – Сусран сзыҟозеиҴ! – иааџьасшьеит сара.      – Суцыхәмарырц сааит, амала сумыпҟан, - деиҭасыҳәеит иара.      – Мап! Сара сусырц зынӡаскгьы сгәы иҭам. Уааизар, бзиала уаабеит! Ҳаицыхәмарлап! – сҳәан, сгәырҕьаҵәа ахәмаргақәа рацәаны ицәырызгеит.        Ҳара аҽны иаахәлаанӡа ҳаицыхәмаруан. Аҷкәын, даара дышсыцәшәоз, сагьшицәымҕыз сеиҳәеит. Санибалак игәы каҳауан, игәалаҟазаара аҽаҧсахуан. Саргьы иасҳәеит, убасҵәҟьа сышицәшәоз, данызбалак изыхҟьа сзымдыруа  сгәалаҟазаара аҽшаҧсахуаз.       Ҳҩыџьагьы акыраамҭа ҳаихәаҧшны ҳаччон. Аӡәи аӡәи ҳахьеицәшәоз ҳацәыҧхашьаны. Аха убри нахыс ҳаиҩызцәахеит, ҳаицрымшәо ҳаицын».       Убри аамҭазы саргьы сааҧшын сҩықәтәеит.