Атермитқәа

Атермитқәа (ашышкамсқәа) Ашоура ахьыҟоу атәылақәа рҿы иуҧылоит убас еиҧш ахәаҷа-маҷа, хылҵышьҭрала архәас, мамзаргьы ахәырпыжә (таракан) иазааигәоу, аха ҧшралеи ҟазшьалеи ашышкамс еиҧшу. Урҭ атермитқәа ҳәа ирышьҭоуп, мамзаргьы даҽакала – ашышкамс шкәакәақәа ҳәа. Атермитқәа, ашышкамсқәа реиҧш рыҭрақәа еицыҟарҵоит, аха урҭ рынхарҭақәа адгьыл ахыхь ауп иахьыҟарҵо, зны-зынла урҭ рыҭрақәа ауаҩышәара, мамзаргьы ауаҩы иоура аасҭа хынтә еиҳаны иҟарҵоит. Атермитқәа лашәуп, рыла иабом, аха рыфатә аҧша-ареи, рынхарҭа дуқәа рыргыл-ареи, урҭ рын-харҭақәа рҿы ауадабжьара хәхәақәа рыҟаҵареи, рыхшара рааӡареи рҟны ирҧырхагам. Инхоит урҭ шышкамсҵас: атермитқәа – аргылаҩцәа есымша аргылара иаҿуп, аибашьцәа еснагь еибашьуеит…, аха ашышкамсқәа излареиҧшым урҭ аҭынч ҧсҭазаара бзиа избо џьоук роуп, аибашьцәа ахыхьчараҿ мацароуп рхы иахьадырхәо, дара рхаҭа аӡәгьы иқәланы иабашьуам. Аҕацәа анрықәлалак аибашьцәа – ашышкамс абацәа ирывагыланы еибашьуеит, рынхарҭақәа рыхьчоит ашышкамс-анацәа. Аҧынҵа змоу атермитқәа рҧынҵақәа рҟынтәи иоурыжьуеит аҷабга иаҩызоу амаҭәашьар, иара убри алагы раҕацәа ирҿагылан иҧхьарцоит. Атермитқәа акәац рфаӡом. Аха бзиа ирбоит аҭӡамц икыдырҵо ақьаад, амаҭәа, аба, аҩнымаҭәа, аҭелтә шьаҟақәа, дара аҭелқәа. Ашәҟәгьы мап ацәыркуам. Дара роуп изфазгьы Ватикантәи абиблиотека аҟынтә ажәытәӡатәи ашәҟәқәа. Ҽнак зны араб хаҵак термитҭыҩрак азааигәара дыцәеит. Ашьыжь данааҧш дҟьантазӡа дшышьҭаз ибеит. Ауха иара дҭаҳәахаа дыцәанаҵы, атермитқәа наиқәлан, ишәыз имаҭәа зегьы рфазаап. Анцәа иџьшьаны, иара дмаҭәалыхмызт акәымзар, ихаҭагьы атермитқәа дырфар ауан.