Ахақәиҭзааразы Ахартиа дуӡӡа

Ахақәиҭзааразы Ахартиа дуӡӡа   Ахақәиҭзааразы Ахартиа дуӡӡа – ари 1215 шықәсазы Англиа ирыдыркылаз, иахьа адунеи аҿы еицырдыруа документуп. Лассы-ласс уи – Магна Карта ҳәа азырҳәоит. Хартиа – ари азакәанқәа, мамзаргьы хаз игоу зинқәак зну документуп. 1215 шықәсазы Римтәи Папеи, акрал Џьон Дгьылда ҳәа зарҳәози, англыз боронцәеи рыбжьара иаҧҵан Ахақәиҭзааразы Ахартиа дуӡӡа. Убри Ахартиа ишаҳәоз ала, акрал еиҵеитәыр акәын иара имчра, егьырҭ инапаҵаҟа иҟаз зегь реиҧш азакәани аусӡбара иаднакылоз ақәҵарақәеи зегьы дрықәныҟәар акәын. Насгьы идыруазар акәын иара имчра шҳәаадам. Акрал Џьон Дгьылда ахартиа иаднаҵоз аҭагылазаашьа идикылон, дақәшаҳаҭын, аха аиашаҳәаразы, инаигӡомызт. Егьа ус акәзаргьы амчра змаз рзы  ари адокумент аҵакы ҕәҕәа аман, уи рхы иадырхәон рзинқәа ахьчаразы.   Ахақәиҭзааразы Ахартиа дуӡӡаҿ иарбан абарҭ азинқәа: иаҳҳәап зхы иақәиҭу атәылауаа ирыман аҭынхатә мазара аҭареи аиуреи рзин, урҭ ахарџьқәеи ашәахтәқәеи рҟынтәи рхы иақәиҭтәын. Ахартиа аусӡбара азин рнаҭон зегьы, атәылауаа зегьы азакәан аҿаҧхьа еиҟароуп ҳәа рыланаҳәон. Азакәан иқәныҟәар акәын зегьы – акрал инаиркны баша атәылауаа рҟынӡа. Ахақәиҭзааразы Ахартиа дуӡӡа апарламент аҧҵара иацхрааит. Уи амонарх (аҳәынҭқар) изинқәа ҧнакуан, амчрагьы еихнашон. Абри ахҭыс дарбанзаалак атәылауаҩ азинмчхара иманы, изинқәагьы азакәан иахьчо дҟанаҵон.