Ацгәы зырҵәыуаз аҳәынаҧ

Ацгәы зырҵәыуаз аҳәынаҧ   Аҳәынаҧ хәыҷы хәыҧсы хаххала, нҵәыҵкәыр аацәыҵкәыр, есымша акылҳарақәа ирцәыҵан. Ацгәы иахәаҧшыцыҧхьаӡа агәаҕ акуан, агәы ҧыжәжәо ицәыҵыҧшны ацгәы иахәаҧшуан. Иара, ҵис мцахәмыцәа ахы шҧабоз, аҳкәажә, инаҳәы-ааҳәуа аҩны иҩнан, иахьаҭахыз итәан, ииан, иаҭахыз афон, иажәуан қьаф аман. Ианаҭахызгьы аҧшәма лкалҭ иқәтәар ауан, лара лгәы аналаҟаз ахы лнапы ықәшьуа илыргәыбзыҕуан, иаргьы хәыр-хәыр ахга алацәа икылаҧшны аҳәынаҧ акылҳара зхы цәыҵаҳәҳәоз иазыҧшуан, аҧаҵақәа қәац-қәацо. – Угәы мытҟәацын, нас уҧшы, аҵыхәа нҟьа-ааҟьо сгәы шыҧнажәо. Избан, иарабеи, сара адәы ақәаҧшра, аҩны аҩнысра азин зсымам, сзыхҟьазеи, ииашоума абри, аӡәы зегьы рзин имоуп, аӡәы акымзарак. Иахьа хәлаанӡа хыхәароуп, ҵис аныцәоу хәашак амҵарсра уҧсы уақәыҧшны, иулымшар башоуп уа утәы, ҵис ашьапхыц уааҵашәар нас, уа утәы акгьы ыҟам. Ус, Ҵис ахьыцәаз, азаара азаазшәа ашҧәма лкалҭ иныҧан, акылҳарахь аҧсы ӡаны аҿынанахеит. Иабеит аҳәынаҧқәа рыҧсцарҭа, инеины инадтәалт, уажәымзар, уажәы акы сыҧсы инасҭаҧҳәа. Аха, аҳәынаҧ хәылаҧс, ацәеи абаҩи еикәыршаны, иҵыс-ҵысуа аҽыҵәахны иҧшын Ҵис агәы аныҧҵәо ҳәа. Зызхара ыфан иҟаз ацгәы, азыҧшра агәы ҧнаҵәан, инҭаҳәахаа ицәеит иахьтәаз. Ҧхыӡ хаак иалоуп уажәы, аха акы еиҧшым. Ҧхыӡ иабоит Аҳәынаҧ хәыҷы акылҳара иаакылсын, ихәылаҧсӡа ацгәы аҧхьа инатәан, ауаз ҳәара иналагеит. – Ҧсҭазаароума ари Ҵис, шҧаасоуҳәара, гәаҟроуп, сааизар лашарак сылахь ианым, иахьа хәлаанӡа еимдароуп, сынкыдыгәгәала, сшәаҧырҳаҧуа, акы абасоуриҳәа ахәыҵарақәа сцәыҵоуп. Ашәара сарҩеит, ашьыцра сгәы афеит, еиҳарак зызхара ыф, ижә ауаа анызбо. Сара сызгәалашәода, уара ма ухәы урҭоит, урхашҭӡом, угәы иаҭахыу аҧшәма илдыруеит, сара уара хәашак уцәкашәозар, ҽаӡәы акы импыҵшәозар ҳәа сылақәа ҭраа сыҧшуп, сызгәалашәода, сызҭахыда, сырбар аҵкыс, срымбар еиҕьуп. Ас аҧсҭазаара ҧсроуп, аҧсра еицәоуп. Сара рыцҳа, знык сызхара сҿаҵаны сызшьуа насыҧ сиҭон, анасыҧҵәҟьа. Уи еиҧш ҟазҵазгьы џьанаҭ агәашәқәа изымаатуаз, аха иабаҟо, иабаҟо? … Ари ауаз азымычҳаит Ҵис, ахәарҭа инҭаҧалан, аҧшәма лышәырша аашьҭнахын акылҳара аҧхьа ишьҭанаҵеит. – Усҭ, ҳәынаҧына, арыцҳахә, аҳәынаҧ, иф узхара, иф, нас иаҳбап џьанаҭ агәашә ззаатуа, иф, иф. Аҳәынаҧ аҧси-аҧси еихьымӡо, ашә афара иаҿын. Иабаз азымбатәбараха алаҕырӡ аакәаашо. – Оф, Анцәа ииныҳәаша, сыҧсы уаҧшәмахеит, шьыри, шьыри, шьыри. Ҵис хәыцуан, џьанаҭ агәашә аатыҵәҟьеит, нас кашыроуп ҳәа, агәашә иҭанагалон еиҧш, аҧшәма аҳәымсаг лҟьеит аарҵәа аҭырганы. Џьанаҭ агәашәқәа ааимҟьеит, усҟан ахагәҭа иақәшәаз аҳәымсаг ахәҵәы убас иаҕьын, алақәа акакаҷмцақәа ааҵашәеит, еимҟьеит усҟан ҵис аџьанаҭ гәашә ахдырраҿы, амацәыс еиҧш иалҟьеит аҳәынаҧ агәаҟра, аҧшәма лыгәнаҳа, иара агәыразра. Абжьы ныхҵаны мап, – мап, – мап аҳәан, акьажыҳәа инеимаҭәаны аҵәыуара иналагон еиҧш, аҧшәма ҧҳәыс лыбжьы хааӡа игеит Ҵис, уабаҟо, уааи ахҷаҭқәа усаан ианысҵеит, крыф, ихәлеит иумбаӡои? Ианааҧш, аҧхьа асаан хҷаҭла иҭәуп, алацәақәа икылаҧшуа, акылҳара икылаҧшыуан аҳәынаҧ лахьыцәгьа. Ацгәы агәы иазымычҳан алаҕырӡқәа аҧаҵақәа инарықәыкәкән ахҷаҭ инылаҭәеит. Иадырит џьанаҭ гәашә шыҧхыӡыз.