Аҳәынаҧқәеи ацгәи

Аҳәынаҧқәеи ацгәи   Аҳәынаҧқәа зегь ааицәажәан, аизара ду мҩаҧыргарц рыӡбеит. Аизараҿы урҭ азҵаара ықәдыргылт: – Ҳаҧсҭазаара даара ицәгьахеит, ацгәы ҭаха ҳнаҭом, ҳахьабалак ҳафоит. Ҳгәы ҧҵәеит, аҵәҵәа ахаҳҵароуп. Ҳаннарҵәоит. Аҵәҵәа ҳзахаҵар, ҳааигәара ианааиуа абжьы ҳаҳалоит, – рҳәеит. Аҵәҵәа абаҳаҧшаари ҳәа ихәыцуа иалагеит. Ус иааргәалашәеит инахараны жьик дшынхоз. Аҳәынапқәа рҽааирбырҭан ажьи иҟны ицеит. Ажьи иҟны инеин, аҵәҵәа ицәҕьычны, иркәымпылуа мацара ирулакгьы ацгәы ахьыҟаз иааргеит. Хышықәса дуӡӡа амҩа иқәын. Аагаразы иааргеит, аха шьҭа игәаҕьны иахазҵода? – Унеины уара иахаҵа, – ҳәа ҳәынаҧык иадырҵеит. – Мамоу, сара сызнеиуам, ацгәы сафоит, – аҳәеит аҳәынаҧ. Ари еимаркит. Аҳәынапқәа – ахәыҷқәагьы, адуқәагьы ирацәаӡаны иҟан. Аха ацгәаҿы анеира акгьы иазымгәаҕьит. Аибарҧсра аҟынӡа инебагеит. Аҭыӡшәа ду рылибахит. Рыбжьы убриаҟара идухеит, ацгәы иаҳаит. Аҳәынаҧқәа аисра иалашыҩкын, ацгәы шырзааигәахаз рызгәамҭаӡеит. Ацгәы аҵәҵәа ахаҵара шырҭахызгьы рхашҭит. Ацгәы гызмал акәзар, рышьҭахьала ираҩаӡо, ираҩаӡо мацара, иаарылагьежьын акакала зегь кны иафеит. Абас ала аҳәынаҧқәа рҭыӡшәа, реимак дара рхаҭа ирҧырхагахеит.