Амшынҳәақәа

Амшынҳәақәа   Ҽнак ҩыџьа ахәыҷқәа, Еснаҭи Манчеи ҳәа хьӡыс измаз, амшын аҟәара иавалан инеиуан. Еибархәмаруан, еицәхасуан. Зынгьы аӡы иалеибажьуан, зны еиҧхныҩлон. Еибарҷырҷыруа, рыбжьы рдуны еицәажәо ишнеиуаз амшынахь ианыҧшы, рацәак ихарамкәа нышьк ӡса-ӡсо ишхыз рбеит. Уи уаҩ дақәтәамызт, ахала иҟан. Иҟалап анышьқәа ахьӡыхгылаз асқьала аҟынтә аӡәы ицәцазар. Аҕәтәы сқьала цқьа изадымҳәалазар акәхарын, ацәқәырҧа иагеит. Ахәыҷқәа иаразнык еилыркааит, анышь, ацәқәырҧақәа ирықәҧало мацара, амшын агәахьы ицар шалшоз. Иҟалон амшын инхыӡла ицаӡаргьы, изтәыз ицәыӡыр. Еснаҭи Манчеи ажәак еибымҳәаӡакәа, иууаӡа иҧан амшын иналаҧалт. Еиҧхныҩланы, зегь раҧхьа анышь аҟынӡа инеиуа ҳәа еивагылан аӡсара иаҿын. Анышь аҟны инаӡарц егьрыгымкәа, Еснаҭ дааҧсазар акәхап дзымыӡсо далагеит. Сшьапы акит, сшьапы, – иҳәан дмадаҕьмадашәо аӡы даалахеит. Манча иҩыза дӡааҟәрылар ҳәа дшәан, дицхраарц далагеит. Ихәцәы данкны далызгоит ҳәа даара иҽишәеит. Аха дицәыхьанҭахеит. Еснаҭ даншәа Манча дихьынҳалан, салҵуеит ҳәа даҿын. Аха алҵра акәым иҩызагьы дӡааирҟәрыларц егьигмызт. Рҩыџьагь рымч рылӡаан, еиҳа-еиҳа аҵахь ирыхон. Ус, иахьынтәиаанагаз уаҩы изымдыруа, рааигәара иаацәырҟьеит амшынҳәақәа. Ахәыҷқәа ашәарҭа ишҭагылаз анырба, ирыцхраарц рышҟа еихеит. Рқьышәқәа рыла ирыҵасуа ихаргаларц иаҿын. Ахәыҷқәа амшынҳәақәа рыцхраарц ишаҿу анырба, ирхьынҳалан, рыхәдақәа рнапы акәыршаны иркит. Нас ҩ-мшынҳәак ахәыҷқәа рызқәа иқәырианы аҟәарахьы инаргеит. Манчеи Еснаҭи рыҧсы анроу, аҟәараҳәа еиҵасуа ахаҳәқәа ирықәиан. Ус инаҧшызар даҽа мшынҳәак, аҧынҵала анышь иагәҭасуа мацара аҟәарахьы ишаанагоз рбеит. Ари аҩыза ахәыҷқәа ахаан ирымбацызт, ашәҟәы аҿгьы иамыҧхьацызт. Амшынҳәақәа акырынтә иӡааҟәрылоз ауаа ирыцхраахьан. Аха амшын ихылан ицоз анышь ырхынҳәны аҟәарахьы иааргахьеит ҳәа уаҩы имаҳацызт. Абас ала ауаҩ иеиҧш иҟәышу, згәы разу амшынҳәақәа ахәыҷқәа еиқәдырхеит.