Акәуа

Акәуа   Дыҟан шәарыцаҩ бзиак. Ҽнак зны уи ила Хәдыш иманы дцеит шәарыцара. Абнара илалаанӡа ила Хәдыш алымҳацәқәа кьацә-кьацәӡа ишьҭыхны, аҵыхәа еиҵыхны ифҩышәо, акы аҧшаауа иалагеит. Ашәарыцаҩ ишәақь харшаланы дашьҭалан иҿынеихеит. Уи жьак, ма бна кәтык абаз џьишьеит. Аха Хәдыш абна иламлакәа, адәы иқәланы аҿынанахеит. Аҧшәмагьы дашьҭалан днеиуан. Дыҧшызар, хылҧа хәыҷык иаҟараны, иҳәыр-иҳәыруа ацара иаҿын акәуа. Уи ахы цәҳәынтаҧсӡа, ашьаҧқәа папаӡа, ицәеиқәараӡа икылыҳәҳәон. Азқәа акәзар акакан ацәеиҧш икьакьаӡа иақәын. Акәуа ала анаба ахи ашьапқәеи аҵәахын, ашьац инылатәеит. Азқәа акәын иубоз. Хәдыш иаашьҭнаҧаан, сацҳауеит ҳәа ацәа кьакьа ацқәа аланаҵо иалагеит. Аха изамыцҳаит. Акәуа амгәацәаҿгьы икьакьаӡа азқәеиҧш ацәа ахазаарын. Аҧхьаҟеи, ашьҭахьҟеи, аганқәеи рыла акәын ахи, аҵыхәеи, ашьапқәеи злацәырнагоз, егьызлаҵәахуаз. Ашәарыцаҩ днеин ала иаҿыҵакыз акәуа ааҿыҵихит, инарҳәаарҳәны акәуа днахәаҧшит. Акәуа ахы аҵыхәеи умбо аҽыҵәахны иҟан. Ашәаныза аҩныҵҟа иҭылашьцааӡа, аҳаҧеиҧш дынҭаҧшит. Уаҟа еиқәаҵәаӡа, зыҧсы ҭоу ак шыҟоу гәауҭон. Ашәарыцаҩ акәуа нарҳәы-аарҳәа цқьа дахәаҧшит. Азқәа иақәу ацәа иҭыхушәа иџьашьахәу асахьақәа анын. Нас инаган ашьац инылаиртәеит. Аха Хәдыш аҽазеиқәкуамызт, акәуа аунажьыр аҭахымызт, иаҿыҵакны аҧшәма ишьҭалан инеиуан. Ус иныҩныҵәаан, иаҿыҵакыз наҟ иршәны инканажьит. Акәуа хәыҷ уаҳа ианазымычҳа, ашьапы аахәыҵганы Хәдыш ақьышәҵәҟьа иарбаны идәықәнаҵазаап, аҿы аҩныҵҟаҵәҟьа цәыҕьҕьа инықәнаҵеит. Убри акәзаап Хәдышгьы иахьыз, изыҵәааз. Хәдыш убри аҟара акәуа иазгәааит, иеишуа, азаигәара анышә абҕьаҭуа иалагеит. Ашәарыцаҩ изымбатәбараны, ала иҟанаҵозеи ҳәа дахәаҧшуан. Уи ашьапала анышә ыҵжааны, иҭагәаҩаны ажреиҧш ианыҟанаҵа, акәуа аашьҭыхны уахь инҭанажьын, анышә ақәҧсара иналагеит. Ашәарыцаҩ Хәдыш даҵаҟьан икаиҵеит. Акәуа анышә иҵыхны, ашьац инылартәан иҿынеихеит.