Агәрагара

  Ари ахҭыс, аиашаз уажәы ианысгәалашәо, даара сарыччоит. Ахәыҷра уҳәеит ҳәа шаҟа гәыҕра, шаҟа гәырҕьара, шаҟа агәрагара ацузеи. Аибашьрашьҭахь, ҳахьынхоз ақыҭа абылра иалҵыз аарла, аарла аҧсы аҭалара иаҿын. Аҩнқәа ана-аара еиқәхаз рыҧсахәага ҭан. Сара сқыҭа Аӡҩбжьа анкьа аҧшӡара иагоз, кыршықәса аибашьра афҩы ахышәшәон. Сан қыҭала Дыџьгьардатәын. Аибашьрашьҭахь, лҭаацәа аныгәхьаалгалакь, - уаала сыҷкәын, ажәабжь шаҳҳәо иҳамбаӡакәа ҳнеиуеит ҳәа, слыман шьапыла амҩа ҳанылон. Амҩа кырбжьан. Ажәабжьқәа, алакәқәа, ишақәхалакь сан, сааҧсара схалыршҭырц лҭахын. Сара аҵәыуара салагон, сышьҭылхырц сҭахын, аха сан лчымазарақәа рнаҩсан, уаҳа налылымшо лыҧсы аарла иҭан. Абар, аилахәларагьы иалагон, абгақәа ана-ара руубжьы абна иалыҩҩуа ианалагалакь сыҧсы схыҵуан. Убас шәарак сылсуан сшьапқәа дысызшәа, исыҵҧсаауан. – Нана, сшәоит, ҳанбанеиуеи? – Уан дукәыхшоуп, даҽа хәыҷык, ичҳа ухаҵами, уара уоуп сзықәггәыҕәуа ҳәа ҿаалҭуан. Сара сгәы еиҳагьы иҭыҧсаауан. – Умшәан, убжьы ҭганы ашәа аҳәара уалага, саргьы иуцысҳәоит, ҳәагьы нацылҵон, аха лыбжьы абжьааҧны еиҧшымызт уажәы. Аха, сааҧсареи сшәареи еилалан, сылаҕырӡқәа ҵааӡа илбааздон. Сан илбарҳәа сшәаны лкалҭ кны снеиуан, зны сыблақәа хызҩон ишылашьцоз сымбарцазы. – Нана амашьына ҳамазтгьы, ма аҽы ҳақәтәар абгагьы ҳахьӡаӡомызт, акы сҳәозшәа ҟасҵон, сан сышшәоз лысмырбарцаз. Ибаҳауама, ма аҽы ҳамазтгьы?.. – Аа, сыхазына, аҽы уҳәама, абар, абар, афырҳәа абна днылалан, ҷындук аалылхын амахәқәа аарыцқьан, – Аа, усҭ, афырхаҵа, уақәтәа, усҭ, лҳәан даҽа ҷын хәыҷык аалылхын, – ари аҟәамчы ауп, уас, исырба уфырхаҵара лҳәан амҩа сылҭеит. Ҳаи, сҳәан сҽы снақәтәеит.  Чоу, ҳәа сҟамчы ахысҟьеит. Аҳы шәсыхьӡа сҳәеит. Еҳе-ҳеи сыҧрит, сан лахь сынхьаҧшын бсыхьӡа налықәҿысҭит. Уажәазы, сгәы иснаҭон ҽыхәак сақәтәан сышьҭхыссаа лаҧш схьымӡо снеиуазшәа. Сгәы ҭыҧсаауан, убас исҭахын уи аҧхыӡ ссир лабҿабахар, знымзар, зны… Сангьы дсышьҭан ахәларагьы наҳахьӡон еиҧш санду лгәашә ҳнадгылт. Сааҧсара абаҟаз, сшәара абаҟаз, зынӡа исхашҭит абгақәа рыбжьгьы сгәы сымызҟьоз, уажәы исаҳаӡомызт. Исаҳауаз санду лыбжьыхаа акәын, - уанду дукәыхшоуп,  ишҧаузҳаи, ушҧахаҵахеи усымбеижҭеи. Ҳаи, сышҧаургәырҕьеи, лнапыҧхақәа исыкәлыршаз адунеиаҿ акы сацәымшәо амч сызҭаз, зыгәра згоз, сзыхьчоз иахьагьы исыцуп. Лызхара слызбомызт. Аиашаз,  Аибашьра иалагазар слымбаӡацызт. Усҟанаахыс, кыраамҭа цазшәа сгәы иабон, саргьы сылабжышқәа сызнымкылакәа санду снапқәа лыкәсыршон еиҳа-еиҳа, сыҽгьы сааигәара аҧсы ашьарц аҭахызшәа ашьац илаиан, уажәы абар аҟамчы, абар иара сҷын-сҽыхәа агәы сызҭазҵаз, сгәы зрыҕәҕәаз агәрагара сызҭаз. Ахәыҷра уҳәеит ҳәа, шаҟа гәырҕьара, шаҟа агәрагара, шаҟа гәыҕра ацузеи. Шаҟа насыҧ сымаз, уажә ауп ианеилыскаауа, уи уцзаауеит уҧсы ҭанаҵы угәалашәара иалыҧхо лашаран. Уахь лассы-ласс ахынҳәра, уи зынӡа даҽакуп, уаназыҧшым иаацәырҟьоит, уарыччоит, уагьарҵәыуоит зны-зынла ахәыҷеиҧш, угәгьы ҭыҧсаауеит усҟанеиҧш.