Аҽадаҟәыш

Аҽадаҟәыш   Иахьа иаҳбама аҽада, зегь ахыччоит, усҟак ахшыҩ еилгам ҳәа, зегьы иныҟәарцоит. Аха, ианагәамҧхагьы уаҕеимшхара, уҽушьыргьы иузырқәацаӡом! Аҧсуаа рҿы аҽада иақәтәаз уи итәы акагьы ыҟамызт, уашьҭан аҳаирплан дақәуртәаргьы, акосмос ахь дцан дааргьы, аҽада дшақәтәаз даанхон, уаҩҧсгьы ихашҭуамызт уи аҽада дшақәтәаз. Аха, уажәы ишәзеиҭасҳәо ахҭыс, иҟалап агәра шәымгаргьы, уи сыла иабаз ауп. Аҧхын ахәыҷқәа ҳаман ҧсшьара ҳцеит Пиҵундаҟа. Уаҟа, аҳауа даҽакыҵәҟьоуп, амшынгьы акы еиҧшым. Ақалақь иара аҧсҭазаара амоуп, иара аҟазшьа, иара агьама, иара алаф. Ахәылбыҽха ҳааҧса-ҳкара ҳаныхынҳәуаз, автобус аанҿасырҭаҿы ҳаннеи аҽада гылоуп. Ҳазхара ҳзахәаҧшуамызт. Ҳавагьежьуа ҳахәаҧшуан, иара ҳагәхьаа зынӡагьы иакӡамызт. Уи иаҭахыз адыруазшәа иҧшын. Ус, абар, ҳаззыҧшызгьы. Архәара иаавҵит ҳавтобусгьы. Ҳнеихеит, аҧхьа аҭаларазы. Аха автобус шаангылаз еиҧш, аҽада неины ашәа аҧхьа инагылеит, ашә анаат, аҭалара аҽазнакит, ари збаз ахәыҷқәа ирбоз рызхамҵеит аҽада автобус иазыҧшуп, жәбоо уара, шәыҧши, ҳаҧхьагьы иҭалеит, атәарҭа ҳмоур ҟалап, шәахәаҧш, ҽырҟәыш ҟаҵаны аҭыҧ шаҧшаауа. Иаргьы неин, акәакь инықҿагылт, аҭаца леиҧш, алымҳақәа лашьҭны, срыцҳашәшьа ҳәа алақәа рыцҳахәхәха. Ари збоз зегьы аччара иаҿын. Автобус ҳҽынҭаҳаҧсеит, аха ҳҽаҳзеиқәкәамызт. Автобус анаангылалакь, ауаа аҭыҧ рнаҭон, инаскьон, нас ахы лышьҭыхны амҩахь иҧшуан, ишәон аҩны еиҩнагарҳәа. Ахәыҷқәа аӡәы алымҳа дамцкласуан, џьоукы аҵыхәа иацрыхон, иара акагь ҟамлазшәа игылан. Ус, ҩба-хҧа аанҿасырҭақәа рнаҩс, ҧхьаҟа ашә ахь еиханы аҿынанахеит. Автобус анаангыла, ашьшьыҳәа инылбаан, иҭабуп ҳәа аҳәоушәа ахы ақәыжьны гәашәк инадгылан бжьык ҳәа ааҭнагеит, аха уҧсы маҷхарын. Ахәыҷқәа еилалт, аҽада азҿыҭра иалагеит, – уыхә зшәода, убналан уабацои, уаангыл. Амашьына андәықәла, хаҵак даарылҵын, арныҟәцаҩ иахь иҿынеихеит. – Ҳаҭыр зқәу! – уи аҽадаҟәыш сара ахә сшәоит, ҳгәылара инхоит, акырынтә исыцхраахьеит, даара згәы ҭбаау акоуп … Уи, хәылбыҽхала аусура аҟынтә санаауа абри автобус исыцҭалан, аҩнынӡа иаауеит, ақалақь зегь иакәшан, иааҧса-икара, изыцхыраатәу ицхраауеит. Уи, зынӡагьы иҽадаӡам. Ари Аҽада ҟәышқәа иреиуоуп. Шәахымччан, сшәыҳәоит иҳәан, амашьына анаанҿас, аҧара нықәҵан дынҭыҵит. Ахәыҷқәа ираҳаз еиҭарҳәон, – о уара, Аҽада ҟәыш, уаҵәы ахә ушәар уҭахӡами, – ҳәа рыччара аанкылашьа амамызт. Усҟан, Аҽадаҟәыш, аҧшәма аҩныҟа ишааз баны, ашҭа иҭаиҵахьан. Иаргьы ахы ақәыжьны, уажәы уаҵәтәи амш иазхәыцуазар ҟалап, Аҽада. Ҟәыш, ииашан иџьоушьартә иҟоуп ари ахҭыс, уи еиҧшгьы ыҟазаап.