Ашықәс аамҭақәа

  Зегь иреиҳау ажәҩан иаҵакьысуа шьха ҳаракык аҿы инхон Аамҭа. Уи иаман ҧшьҩык ахшара. Ҩыџьа аҧҳацәа, ҩыџьа аҧацәа. Урҭ ирыхьӡын Ааҧын, Аҧхын Ҭагалан, Аӡын. Ааҧни Ҭагалани ҭыҧҳацәан. Аӡыни Аҧхыни рҧарацәан. Урҭ зегь бзиа еибабон, аха рыцҳарас иҟаз ашықәс дуӡӡа еибабаӡомызт, ишеишьҭаз ашықәс нҵәон. Ааҧын данааилакь адгьылахь аҧсаатә рашәаҳәабжьи, амра ашәахәа ҟәандақәеи аҧсы ҭарҵон ашәаҧыџьаҧ. Абыҕьқәа пытуан. Ашәҭқәа шәҭуан. Аҧсабара аиаҵәа ҧштәы ахалон.Ныҳәан. Ааҧын лыҧшӡара еиҭаҳәашьа амамызт. Зегь бзиа дырбон. Зегьы лзыҧшын. Уи зегьы ирылҭон агәырҕьара, абзиабара, агәыҕра. Уи лаҳәшьеи, лашьеи дрышьҭалан адгьыл дакәшон, урҭ рзы илырхион, илырҧшӡон Аҧсабара. Ааҧын лааира зегь раҵкьыс Аҧхын дазыҧшын. Уи Ааҧын илызҿиҭуан: Оҳо, ҳо бабаҟо Ааҧын , Ааҧын, Ааҧын, аха дубар дааг. Дныҵабахьан. Ашьхақәа еимырдон аҿыҭыбжьы Ааҧын, Ааҧын, Ааҧын. Аҧхын арҧызба ҧшӡан, иблақәа шамшамуа, амца даҩызан. Игәы былуан, иаҳәшьа Ааҧын дыгәхьааган зны-зынла дҵәуон. Усҟан, адгьыл амра иаршыз, ақәыршаҩы ахьыӡсон. Аҧхын игәы дуун, иҭбаан, иҧхара ашәахәеиҧш зегьы ирзишон. Аҧсабара ашьшьыҳәа еинҭәылон. Аҧхын Ааҧын данизмҧшаалакь Ҭагалан длышьҭалон илызҿыҭуа О, ҳо,ҳо Бабаҟо Ҭагалан, Ҭагалан, Ҭагалан. Ашьхақәа еимырдон аҿыҭыбжь Ҭагалан, Ҭагалан, Ҭагалан. Аха дубар дааг дабаҟахыз. Лара Ҭагалан ссир. Лыхцәы хьыҧштәыла еилыџьџьо лхьыуардын дақәтәан шәырхыла ирҭәны бҕьыла иҩычаз амҩа данылан днеиуан аҿыҭыбжьы ахьлаҳаз. Аха иубар иаахә Ааҧынгьы дыҟам. Аҧхынгьы дыҟам. Аӡынгьы дыҟам. Лара урҭ рызҿыҭра далагоит: Оҳо, ҳо, шәабаҟо сашьцәа, саҳәшьа Ааҧын, Аҧхын, Аӡын. Сышәзыҧшуп. Шәа шәзы изуит ачара ссир. Шәабаҟо! Ҿымҭран. Ашьхақәа еимырдон аҿыҭыбжьы! Оҳо, ҳо Ааҧын. Аҧхын. Аӡын. Иубар иаахә аӡәгьы дыҟаӡам. Лылахь еиқәышьы, абыҕьқәа илықәыҧсоз лҽылаҳәан дныҵабон. Ихьшәашәон хәыҷ-хәыҷы лылабжышқәа. Урҭ рымбара зызхымгаз рашьа дҟәашкакараӡа ашлара даҿын. Игәхьаагара алабжышқәа ҵаауан, урҭ абырлашқәа иқәыҧсычҳара аҧша еиланаргьежьуан. Агәра игар иҭахӡамызт урҭ уаҳа ишиимбоз, рышьҭа сзыҧшаауазар ҳәа Адгьыл зегь сышкәакәала ихиҟьон, урҭ рышьҭа, шьҭак еиҧшымызт, иаразнак идыруан. Нас, урҭ гәхьааган рызҿыҭра далагон Оҳо, ҳо, шәабаҟо сашьа, саҳәшьцәа, оҳо ҳо. Шәабаҟо. Ааҧын. Аҧхын. Ҭагалан дышәхашҭыма шәашьа Аӡын. Уаха ҿыц амҩа сықәлоит адгьыл ақәшараз. Ҳаизигоит Ашықәс Ҿыц. Шәара шәзы сылбааит зегь реиҳа иҳаракыз Ашьха. Ишәзысшоит меигӡарахда Ҳазшаз Ибзиабара! Игәырҕьара! Илыҧха. Ҽааныбзиала, Ҽаанбзиа, Ҽанбзиала. Бзиа избо зегьы. Ҽааныбзиала Ааҧын! Ҽааныбзиала Аҧхын! Ҽааныбзиала Ҭагалан! Ҽааныбзиала Аӡын! Бзиабарала, гәырҕьарала, гәыҕрала иҭәызааит Аҧсҭазаара! Ҽааныбзиала!