Ашоколад

Ашоколад   Ашоколад зегьы бзиа ирбо ахаатә ауп. Уи индиаа, ацтекцәа ирхәыцит. Ашоколад акакао арыц иалырхуеит. Акакао арыцқәа акакао аҵла иҿырхуеит. Ахыннатә акакао рыжәтәны рхы иадырхәон: акакао иҷҷаз арыцқәа инидиаа ирлагон, аӡы иаладыршьшьон, нас апарпыл ҟаҧшьы аларҵон. Ари аиларшьшьы урҭ “Анцәа ррыжәтә” ҳәа иашьҭан. Нас ашоколад ашьақар, аваниль, ацха, афҩы хаақәа ралаҵара иалагит. Ашоколад атәы Европа раҧхьаӡа ираҳаит Испаниа. Испаниатә аҳра ари адырра маӡа иҵәахны ирыман. Ари амаӡа ицәырганы аҳәаразы ауаа аҧсра рықәырҵон. Ахьыӡ рацәа рхәыцит: ашоколад ца, ашоколад еиқәаҵәа, ихаау-ицоу ашоколад, ахш шоколад, ашоколад шкәакәа. Даараӡа акыр аамҭа аҧхьа, ашоколад абеиацәа ракун изфоз. Уи даараӡа аху ду аман. Нас акакаои, ашьақари рыху анмаҷха, ашоколад ахугьы маҷхеит. Уи аахуара аҕарцәагьы ирылшон. Ашоколад ауаҩы изы ахырҳәагара змоу аҟазшьақәа амоуп: уи агәалаҟазаара еиҕьнатәуеит, ауаа рымч ҭанаҵоит. Ажәытәын ашоколад аимҳәара, ахьҭалалара, аинфекциақәа рыхәшә ҳәа ирыдыркылон. Иреиҕьӡоу агьами, ахаҭабзиареи рыла ашоколад иахьагьы ахаатә иреиҕьуп ҳәа иҧхьаӡоуп.